суббота, 6 января 2018 г.

Коми сьыланкывъяс

Коми сьыланкыв - тайö войтырлöн лов. Ёртъяскöд, öтнад ли, кор  долыд либö шог сьöлöм вылад - сьыланкывъяс  миян гöгöр.  Выль, либö важ коми сьыланкывъяс, йöзкостса либö сьыланкывйыслöн эм гижысь  - найö чорыда пырöны сьöлöмö. Валентина Есевакöд бöрдам "Коми ань" кывзiгöн. Гортад кыскö "Ичöт сиктöй" кывзiгöн. "Бур батькöд - мамкöд олöм" жалитам, шудсö воштöмысь, мича нывсö. Выль во паныдалам "Козйö, козйö" сьыланкывйöн. Гажöдчам коми частушкаясöн. Кагугъясöс унмöсьöдам "Ӧввö" улö. Мусукасям "Зиль - зёль" сьыланкыв улын. Пыдди пуктö коми морт ассьыс сьыланкывъяссö, сы вöсна мый сiйö мунö олöм пыр: чужöмсянь бöръя лунöдз. Сьыланкывъяс некор оз пöръявны, оз кольны сьöкыд здукö. Быд сьыланкывлöн эм  аслас олöм пас.

Сьыланкывъяс:
1. "Кодлы кыдз, а меным колö"
2. "Сьыла - сьыла"
3. "Висер вожын"
4."Кадриль"
5."Марьямоль"
6. "Паськыд гажа улича"
7. "Шондiбанöй"
8. "Мыйла эськö"
9."Коми ань"
10. "Катшасинъяс"

1- 2
 
3- 4
 
                                                                             5 - 6
 
                                                                           7 - 8
 
                                                                             9 - 10
  

Миян коми колипкай!

Есева Валентина Васильевна – нималана да тӧдчана коми сьылысь. Сiйӧ чужис 1923 воын Усть-Сысольскын. Верӧсыс  шылад тэчысь Вацлав Иосифович Мастеница. Валентина Есевалӧн зэв мича, ён гӧлӧс. Тадзи коми сьыланкывъяс йылысь висьталiс нималана сьылысь « Ме зэв ёна радейта ассьым коми сьыланкывъясӧс. Найӧ мелiӧсь, шоныдӧсь. Сьыланкывъяс отсалӧны овны, уджавны, шойччыны».        
Валентина Есева

воскресенье, 31 декабря 2017 г.

Выль воӧн!

 

ВЫЛЬ ВОӦН!
Тӧв нырӧн водзӧ пыр шутёвтӧ олӧм:
Некыдзи сійӧс он домав, он кут...
Мӧдӧда Выль вося би кодь пӧсь чолӧм,
Сьӧлӧмсянь сиа кузь нэм да бур шуд!

воскресенье, 17 декабря 2017 г.

"Лысва войтлы" - 30!

Ӧшым тӧлысь 16 – ӧд лунӧ  мунiс концерт карса Культура Керкаын. Сьылiс, йӧктiс да гажӧдiс тайӧ  рытнас «Лысва войт». Сьылiсны коми да роч сьыланкывъяс.   Ансамбльлы тырис 30 во! Быттьӧкӧ уна, а быттьӧкӧ и этша. Уна концерт сетiсны 30 во чӧжнас. Уна йӧзӧс гажӧдiсны Республикаын. Вӧлiны найӧ суйӧр сайын и Россия пасьта ветлiсны – сьылicны. Веськӧдлӧ ансамбльнас Екатерина Васильевна Григорьева. А медводдза веськӧдлысьыс вӧлi Любовь Петровна Розе. Сэки, 1987  воын, сьылiс группаас 6 коми ань. Аслас творчество пыр тӧдмӧдiсны коми йӧзкостса фольклорӧн, культураӧн, коми гижысьяскӧд да шылад тэчысьяскӧд. 1992 воын «Лысва войт» лои медводдза лауреатӧн Анапа карын. 1993 воын сьылiсны международнӧй финн – йӧгра фестивальын Ханты – Мансийск карын. А 1994 воын ансамбльыслы сетiсны «Йӧзкостса коллектив».  Ветлicны Суомиӧ, Испаниӧ, Москваӧ, Кудымкарӧ, Эстонияӧ, Польшаӧ. 1998 воын гижисны и петiс медводдза альбом. Сиам ыджыд вермӧмъяс, дзоньвидзалун. Мед тайӧ котыр пыр водзӧ юргис коми сьыланкыв!

«Юргӧ танi коми сьыланкывъяс,
Сёрнитӧны комиӧн зонъяс да нывъяс.
Ачым коми, рӧдвуж коми, коми йӧзыс тыр.
Коми, чужан муӧй, ов дыр!»






понедельник, 6 ноября 2017 г.

Чужан лунӧн "Юрган"!


16 арӧс "Юрганлы". "Юрган" журналистъяслы  артмис аддзыны аслыспӧлӧс туй визь, кодi торъялӧ мукӧд каналъясысь. Тайӧ телеканалыслӧн  уна бур уджпетас. Лэптӧны да видлалӧны эфиръясын ёся сулалан мытшӧдъяс. Петасъяссӧ вӧчӧны и нуӧдӧны енбиа журналистъяс. Кевма, мый  водзӧ киподтуйыс, уджачлуныс отсаласны журналистъяслы вӧчны бур петасъяс - выльторъяссянь гажӧдчан да челядь вӧчӧмторӧдз. Югзьӧд да висьтав "Юрган" "Миян йӧз" йылысь, босьт "Вочакыв" йӧзлысь, кодi сиӧ ассьыс уджсӧ Коми мулы, кывлы, культуралы.



пятница, 20 октября 2017 г.

Гӧсть Финляндияысь

Йирым тӧлысь 20 лунӧ миян велӧдчанiнӧ локтiс гӧсть Финляндияысь. Зэв мича нима ныв Сиири. 10 класса велӧдчысь, Константин Сорокин, нуӧдiс экскурсия школа кузя коми, фин, английскӧй кывъяс вылын. Костя коми кывсӧ кутiс велӧдны мӧд классянь. Сдайтiс коми кывйысь экзамен «5» вылӧ. Рытъяснас велӧдiс фин кыв. И ӧнi сiйӧ кокниа сёрнитӧ роч, коми, фин, английскӧй кывъяс вылын. Сиириялы кажитчис ставыс.




понедельник, 9 октября 2017 г.

Велӧдысь лун Москваын!

Йирым тӧлысь 5 лун  - Велӧдысь лун паныдалi Москваын, Кремлёвскӧй Дворецын. Сцена вывсянь, тайӧ луннас, висьталiсны, кодi лоис "Учитель года 2017".  Пеликансӧ сетiсны Илья Демаковлы, история да обществознание велӧдысьлы. Кӧть и шуӧны, мый велӧдысь уджлӧн аньлӧн чужӧм, финалас петiсны нёль зон да ныв. Конкурсас пырӧдчисны 85 велӧдысь: на пиысь 12 сиктса. Шӧр арлыдыс - 36 арӧс, а велӧдысь стажыс - 12 во. Вермасисны конкурсас 16 роч кыв да литература велӧдысь, 14 - история да обществознание, 9 - артасян, 9 - иностраннӧй кывъяс, 6 - география, 6 - ичӧт класса велӧдысьяс, 5 - физика, 4 - биология, 4 - информатика. Концерт вылас локтiсны велӧдысьяс став Россия пасьта. Велӧдысьяслы сьылiсны да йӧктiсны артистъяс. Уна бур кывйӧн чолӧмалiсны Велӧдысь лунӧн.